Leita í fréttum mbl.is

Bloggfærslur mánaðarins, júlí 2008

sjómannslíf.

Góðan og blessaðan daginn. Það er herra Vala Matt sem skrifar að þessu sinni fyrir hönd stýrimannsvaktarinnar en Kastljóskóngurinn er farinn í land með fulla buddu af aurum. Það kemur svo í ljós í næstu viku hvort það verður Logi Bergmann, Hemmi Gunn eða Sirry sem skrifar pistilinn fyrir hönd vaktarinnar.

Já sjómennska er ekki það sama og sjómennska! Frá því að  ég var 15 vetra hef ég fengið tækifæri á því að leika lítil gestahlutverk um borð í togurum og loðnubátum og kunna því  mjög vel. Hefur þetta alltaf farið fram í þokkalega snyrtilegum ryðkláfum og leiksviðið hefur ávalt verið reykmettaðar innréttingar, grútskítugar stakkageymslur og þröngir tveggja til þriggja manna klósettlausir klefar. Karakterarnir hafa oftast verið í formi úrillra, daunillra, kamel reykjandi, lopapeysu-beljaka sem vakna ekki fyrr en eftir þrjár rettur og tvo rótsterka kaffibolla. Þessir karakterar láta sér lítið skipta óþarfa hreinlæti eða hugulsemi heldur rjúka áfram af meira kappi en forsjá... topp menn! Þetta var það umhverfi sem ég kannaðist við og hafði tekið þátt í. Ég átti því ekki von á öðru en þessu þegar ég fékk hringingu frá Kaptein Daða og ég boðaður um borð í Aðalstein Jónsson. Þegar um borð í Aðalstein var komið tók við veröld sem ég þekkti ekki, ég vissi ekki hvort ég var lífs eða liðinn, hvort ég hafi verið numinn á brott af geimverum eða væri fórnarlamb í falinn myndavél.... ég var allt í einu staddur inn í klefa sem var á stærð við delux herbergi á flugleiða hótelinu. Það voru hrein sængurföt á leðurstól við kojuna mína, flísalagt baðherbergi með stórri sturtu og upphengdu klósetti. Ég fékk mér sæti á leður sófanum sem tilheyrði afslöppunar álmu klefans og dróg andann djúpt til að átta mig að aðstæðum. Þetta var of flott til að vera satt!! Þar sem ég var ennþá að reyna að átta mig á aðstæðum kíkti ég ofan í skúffuna undir kojunni en þar blasti við mér 380 bækur af Rauðu seríunni eða upplag allt frá árinu 1981. Mér stóð ekki alveg á sama og vissi ekki hvort ég var kominn út á sjó eða hvort væri búið að læsa mig inn á herbergi 312 í kvennafangelsinu í Kópavogi. Eftir að hafa gluggaða aðeins í bókina " bláu augun þín" úr Rauðu seríunni rölti ég mér upp í borðsal til að hitta mannskapinn og fá mér léttan snæðing. Þegar ég var rétt búinn að tylla mér niður í gyltasalnum og fá mér lambkjöt á diskinn vindur sér að mér maður, dökkur á hörund í hvítum kokkagalla og segir með sterkum hreim " má bjóda tér meiri rjómi"?? Þetta hljómaði eins og á ítölskum resturant. Enn og aftur stóð ég á gati. Þar sem ég sat þarna og úðaði í mig þessum guðdómlegu kræsingum byrjar áhöfnin að koma inn í boðsalinn. Þetta voru ekki neinir kamelreykjandi lopapeysu kallar heldur vel klæddir og stæltir herramenn. Fyrstur kom inn svampur sveinsson eða Pétur grímseyingur. Ég sá strax að það var ekki allt með feldu því hann svitnaði eins og veðhlaupahestur við það eitt að bjóða mér góðan daginn en hann var í sama hlutverki og ég, í sínum fyrsta túr. Þar sem ég er að telja svitaperlurnar á enninu á honum dregur fyrir sólu og inn labbar golíat.... mér er litið upp og ég horfi beint í klofið á tröllvöxtum manni. þarna er mættur hann Haraldur og vissi ég strax að þennan mann myndi ég aldrei vilja styggja því hann myndi rífa af mér alla útlimi og henda mér eins og kartöflupoka í sjóinn ef ég myndi sýna einhverjar snöggar hreyfingar. En sú var ekki raunin, golíat hefur hjarta úr gulli og myndi ekki gera flugu mein ( nema hugsanlega núna eftir að hann les þetta..) Vappandi á eftir honum kemur Sævar eða " sævar of the lambs " og við skiptumst á hugskeytum og vangaveltum og það algjörlega án orða og það færði mig aftur yfir í það að halda að ég hefði verið numinn á brott af geimverum. Kapteinn Daði kom þá niður og vildi sýna mér restina af skipinu. Þegar við gengum eftir fyrsta ganginum mætir mér til mikillar hræðslu, skelfirinn frá unglings árum mínum. Þetta var enginn annar en Kiddi stálhnefi maðurinn sem rotaði diskó kónginn og júróvisíon dansarann Draupni. Ég vissi að þessi maður var til alls líklegur og hafði mig ekkert í frammi á meðan Daði ræddi við hann. Seinna kom svo í ljós að Kiddi hefur verið hingað sendur frá annari vídd því hvílík innri ró og jafnvægi er vart að finna í þessum heimi. Gullsálin eins og ég kýs að kalla hann núna er líklegast með betri mönnum sem ég hef hitt á lífsleiðinni. Á ganginum langa mættum við svo öðrum manni sem leit út fyrir að vera nokkuð normal nema fyrir utan að það lak úr nefinu á honum svartur taumur sem ég gat ekki útskýrt. Þar sem ég stari á þennan svarta taum skýst út úr honum tungan eins og á gaddeðlu og hrifsar tauminn úr nefinu á sér.. augun ranghvelfast svo eins og um fullnæginu væri að ræða. Þetta var Badda stýrimaður, topp maður þar á ferðinni. Það eru svo mun fleiri eðalmenn hér um borð og mun ég fara betur í saumana á því á næstu dögum. Annars erum við á leiðinni í land með nánast fullt skip og allir sáttir og sælir með það enda ekki annað hægt. Þetta er fátt eins gaman og að sigla á góðu og fallegu skipi með skemmtilegri áhöfn.

Þangað til næst.

kv. Dáni og strákarnir á Allanum.


Betra seint en seinna

Já góðan og blessaðan daginn til sjávar og sveita

þá eru það allra allra helstu fréttir af okkur á allanum.þær eru þær að í þessum skrifuðu orðum er búið að frysta tæplega 200 tonn og því ekki nema rétt 100 tonn sem vantar í frystikistuna því að ákveðið var fyrir þennan  túr að slá aftari frystikistunni undir grút,sem ennþá er eitthvað lítið af í skipinu  en hann kannski kemur bara  seinnaWink.En annars bara allt það allra besta frá okkur á AllanumLoL


Sól slær silfri á voga - sjáðu Hólmatind loga

Jú mikið rétt Aðalsteinn Jónsson er á leiðinni heim. Verðum í innfirði Reyðarfjarðar, Eskifirði, um klukkan níu í fyrramálið.

Hífðum einhver 100 tonn í gærkvöld og höfum síðan bætt á frystilestina sem býr nú ekki yfir miklu olnbogarými fyrir Halla - enda kallgreyið með tennisolnboga.

Nýjasta talning segir 21 þúsund kassar, rúmir, í lest eða tæp 470 tonn. Fer vonandi í 490 tonn ef Ívar kemst í stuð eftir hamborgarana í gær.

En að því sem skiptir máli, fréttum af skipverjum á bátsmannsvaktinni:

Kristján Örn sást gera einkennilegar æfingar í æfingasalnum um borð í gærkvöldi - líkast til einhvers konar grindarbotnsæfingar ef rétt var í lesið. Hann hefur lækkað forgjöfina um heila tvo í túrnum, án þess að hafa svo mikið sem slegið kúlu.

Halli okkar hefur setið sveittur við að gefa þar til bærum yfirvöldum skýrslur um aflann með þvílíkri nákvæmni að einum skipverja sýndist hann spyrja einn makrílinn að nafni og heimta af honum skilríki seint í nótt. Buxurnar hans eru í fínum málum.

Sölvi er enn að melta það með sér hvort hann eigi að taka mönuninni með tattúið en samkvæmt öruggum heimildum liggur nú frammmi undirskriftarlisti í Shell á Eskifirði vegna þess. Sölvi heldur áfram að æfa sig fyrir Þjóðhátíð. Stendur nú í sjóstakk undir sjóspúlnum í tíma og ótíma til að venjast "blíðunni" við Stórhöfða betur. Hann hefur líka æft glasalyftingar með könnu nú um nokkurt skeið og tekur nú 2,3 sopa á sekúndu. Sjálfsagt met.

Tommi á ennþá kók!

Sævar hefur hafið upplestur á ljóðum Steins Steinars í pásum, svona í tilefni af afmæli skáldsins.

Kastljósskvikindið hættir formlega að þiggja sjómannafslátt í fyrramálið og heldur í sína svokölluðu vinnu þarna fyrir sunnan. Pökkunarreynslan mun áreiðanlega nýtast honum vel þar. Hann vill koma á framfæri kærum kveðjum til Actavis og Omega-Pharma fyrir að hafa geta verið viðstaddur fyrstu tvær vaktirnar.

Annars kveðjum við í bili með orðum skáldsins:

"You never count your money, when you´re sitting at the table, there´ll be time enough for counting, when the deal is done." Kenny Rogers, The gambler.

Sem útleggst einhvern veginn svona á íslensku: "

 "Þú skalt ekki telja aurana meðann þú stendur einn í pökkun, það er nægur tími til þess, þegar landi er náð." 

Svo er rétt að taka það fram að það eru tvær vaktir hér um borð.


Og hana nú - heimspeki fyrir lengra komna.

Eins og Jón Ársæll segir alltaf: "Komiði sæl og blessuð"

Hífðum 300+ í dag og nú þegar talið hefur verið úr öllum kjördæmum eru rúmlega 16 þúsund kassar eða tæp 360 tonn komin í frystilestina. 

Jón Kjartansson togar nú og á ekki langt í að fylla sig, blessaður.

En að öðrum fréttum:

Kristján Örn er farinn að æfa sveifluna fyrir inniveruna. Áhugasamir geta fylgst með framförum - eða afturför - á golfvellinum á Eskifirði, utan opnunartíma.

Davíð er að gera alla vitlausa í brúðkaupsæfingum sínum. Hann rífur nú hringa af mannskapnum til þess eins að æfa sig í að setja þá á aftur. Var næstum búinn að sarga puttann af Kastljósskvikindinu með slípirokk til að ná tattúveraða hringnum af honum en með snarræði tókst að afstýra því að Helgi yrði til fingranna eins og pabbi hans.

Halli er ekki á þeim buxunum að fara að skipta um buxur þrátt fyrir gat. Nýjustu fréttir herma að hann hafi ekki þurft að festa kaup á nýjum, eins og ranghermt var í fyrri frétt. Hann fann buxur sem annar fyrrum skipverji, sem líka kláraði matinn sinn sem barn, hafði skilið eftir sig.

Sævar setti hljóðan í morgun, en það stóð ekki lengi.

Sölvi tekur við áskorunum næstu daga vegna mönunar sem hann sætir nú. Hún gengur út á að hann noti Þjóðhátíðarfríið til að láta húðflúra á sig svaðalegasta sjóaratattú sögunnar. Hugmyndin er fenginn frá einum föllnum meistara sem náði ekki að láta verða af því og snýst um að fá sér toghlera á sitthvort herðablaðið; með áföstum bakstroffum sem hlykkjast niður bakið og niður á rasskinnar. Endilega skorið á Sölva í gegnum alla mögulega miðla.

Kastljósskvikindið hefur þegar hafið æfingar til að byrja í aukavinnunni og yfirheyrir nú bátsmanninn reglulega um alla mögulega og ómögulega hluti.

Tommi okkar er fundinn aftur og sömuleiðis nokkrar flöskur af kóki sem hafa verið ófáanlegar um borð síðan í þarþarsíðasta hali.

Ekki hefur enn náðst í skipstjórann eða stýrimanninn. Útgerðarstjórinn var þó helvíti hress þegar náðist í hann, í hálfleik á leik Fjarðabyggðar í gær. Staðan þá var Fjarðabyggð í vil. Ekki hefur náðst í kallinn síðan.

Bátsmannsvaktin kveður og óskar góðrar nætur. Kveðjum með heimspekilegum hugleiðingum frá yngsta skipverjanum:

"Hver ræsir ræsarann?"

Já hver skyldi gera það? Kannski stýrimannsvaktin geti svarað því?


Stýrimannsvaktin tekur til máls.

Gott kvöld, stýrimannsvaktin hérna, við erum frekar feimnir við að tjá okkur þar sem að við búum ekki svo vel að hafa stjörnufréttamann í okkar röðum.

Vel gengur að frysta makrílinn en það er að slá í 300 tonnin. ekkert hefur minkað í gúanólestunum og er talað um að fara að setja í fiskikör og annað lauslegt á dekkinu. Jón er að toga núna með einhvað misjöfnum árangri en sagan segir að hornfyrðingarnir séu að fá hann austur af okkur, seljum það ekki dýrara en við keyptum það.

Mikið verður um mannabreytingar í næsta túr, en gamalkunnug andlit munu koma til okkar og munu þeir ekki verða nefndir að svo stöddu.

kv.stýrimannsvaktin.


Og aftur hér!

Allt fínt að frétta af miðunum eftir smá kaldaskít - eða brælu eftir því hvað menn eru sjóaðir.

Eftir smá snap var látið fara seint í gær og híft rétt eftir miðnætti, ca 210 tonn.

Nú eru 261 tonn komin í frystilest eða tæplega 12 þúsund kassar. Lítið vantar uppá að grútur flói upp um öll göt sömuleiðis.

Helstu fréttir eru annars þessar:

Kristján Örn Kristjánsson, golfari og fyrrum motor-cross kappi, er orðinn stuðningsmaður Breiðabliks eftir að Kastljóskvikindið ákvað að ánafna honum Breiðabliks-derhúfunni góðu. Formaður Breiðabliks hefur þegar gefið út fréttatilkynningu og flaggað í Kauphöllinni vegna þessara tíðinda.

Sölvi Ómarsson heyrist nú raula gamla og nýja Þjóðhátíðarslagara auk þess sem hann eyðir pásunum í að halda á kveikjaranum sínum logandi með aðra hönd út í loftið, eins og að hann haldi utan um íturvaxna Eyjamær.

Kastljóskvikindið heldur því fram að draugur gangi ljósum logum í klefanum sem honum var úthlutað, en tilheyrir venjulega ljúfmenninu Haraldi Friðbergssyni frá Framnesi. Aðrir segja fylgju Halla einungis vera að sjá til þess að gengið sé vel um klefann í fjarveru hans.

Tommi er fundinn og týndur aftur einhvers staðar á milli kara.

Sævar er með málverk en í ljós kom að hann skartar harðasta húðflúrinu um borð: Akkeri!

Davíð hefur nú hafið æfingu á útgöngu aftur kirkjugólfið vegna brúðkaupsins sem nálgast nú óðfluga. Hann nýtur þar dyggrar aðstoðar svila síns og granna. Davíð mun taka upp nafnið Fossberg í kjölfar þess að hann kvænist Erlu sinni.

Haraldur Harðarson hefur gatað nýju buxurnar. Ekki þykir tímabært á þessari stundu að spá fyrir um hvort bæta megi gatið. Halla líður eftir atvikum vel.

 Ekki náðist í Daða eða Ómar við vinnslu fréttarinnar. "DÓÓÓMARIIIIII," var það eina sem útgerðarstjórinn sagði við fréttamann þegar náðist í hann. Hann var þá staddur á einhverjum jafnteflisleik Fjarðabyggðar.

Fía muldraði eitthvað ofan í bringuna á sér þegar hún var innt viðbragða við fréttum dagsins.

Fleira er ekki í fréttum. Veriði sæl.

ES: Er yfirhöfuð einhver stýrimannsvakt hérna um borð? Nei við segjum svona.

Bátsmannz


Hér er ég, hér er ég. Góðan daginn, daginn, daginn!

Bátsmannsvaktin mun nú flytja fréttir í tilefni af upprisu sólar á nýjum degi.

Sölvi Ómarsson les, tæknimaður er Kristján Örn Kristjánsson:

Heyrst hefur af ágætis gengi í frystingunni á í það minnsta annarri vaktinni á Allanum þennan túrinn. 

Stýrimannsvaktin er að ná sér niður eftir að tölvuhakkarinn Fía hakkaði sig inn á útvarpið um borð og svívirti stýrimanninn og ónefndan hjólhýsaeiganda. 

Sjónvarpskvikindið er búið að jafna sig á sjóveikinni sem hrjáði hann fyrsta sólarhringinn og étur nú ferðaveikislyf eins og smartís milli þess sem hann spyr hversu mikið hann hafi nú grætt á frívaktinni.

 Halli splæsti í nýjar sjóbuxur eftir að hafa rifið þær sem hann keypti í Esso-sjoppunni á Eskifirði um það leyti sem Ívar var að læra að lesa.

Kristján Örn var leystur af við kassavélina - bara til að drekka hálfan kaffibolla og þurfa síðan niður aftur til að koma öllu í gang.

Sölvi er hrezz.

Sævar er sí malandi. Hann undirbýr nú nýjan sjónvarpsþátt: Á tali.

Tommi sást síðast undir flökunarvél, veit einhver hvar hann er blessaður?

Davíð hefur stundað stífar æfingar í að standa upp og setjast niður enda stutt í að hann gifti sig. Hann heyrist líka tauta já ofan í bringuna á sér í tíma og ótíma.

Fleira er ekki í fréttum. Veriði sæl.


Góð makrílveiði.

Við á allanum erum búnier að frysta 180 tonn af makríl. Að auki eru komin einhver 700 tonn í grút.

Við hífðum í nótt og voru það einhver rml 500 tonn af 90-100% makríl. jón er að toga núna og er að við best vitum að raða inn nemunum.

kv.stýrimannsvaktin

p.s. hvar er þessi svo kallaða bátsmannsvakt........


Fréttir.

Við erum búnir að taka tvær sköfur og er aflinn úr þeim einhver 400-500 tonn upp úr sjó. vel gengur að frysta eins og er en smá byrjunarörðuleikar voru að hrjá okkur í byrjun túrs.  Núna eru komin niður 78 tonn af frystum afurðum og einhver 200-300 tonn af grút. jón kj. er búin að taka eina sköfu og uppskar hann rml.500 tonn af 90% makríl og er að toga núna eins og er, ekki er vitað um árangur.

Við viljum allir sem einn kærlega að heilsa henni "FÍU",

Kv.strákarnir á allanum.

 


Búnir að landa og byrjaðir í túr 2.

Jæja gott fólk, þá erum við byrjaðir að toga og ljúsastsaða segir 2 ljós. við fórum frá eskifyrði í morgun eftir að löndun og fundarhaldi með útgerðarstjóra lauk.  Á þeim fundi kom í ljós að aflaverðmæti var ekki nema 63 miljónir en einhvers misskilnings gætti á meðal áhafnarinnar með skiptingu aflans, en samt sem áður er þetta besti turinn sem að hefur verið gerður á skipið og ættum við ekki að vbera í vandræðum með að toppa þetta svo um munar þegar að við fyllum skipið alveg. við vorum með 450 tonn af frystum afurðum og 860 tonn í bræðslu. Jón Kjartansson var með fullfermi eða 2300 tonn af 53% makrílblöndu.

Setujum inn færslu í fyrramálið með aflatölum og gangi mála í vinnslunni.

kv.strákarnir á allanum.


Næsta síða »

Uppsjávarskipið

Aðalsteinn Jónsson SU-11
Aðalsteinn Jónsson SU-11
Heimasíða Aðalsteins Jónssonar SU-11
Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Innskráning

Ath. Vinsamlegast kveikið á Javascript til að hefja innskráningu.

Hafðu samband