Og hana nú - heimspeki fyrir lengra komna.

Eins og Jón Ársæll segir alltaf: "Komiði sæl og blessuð"

Hífðum 300+ í dag og nú þegar talið hefur verið úr öllum kjördæmum eru rúmlega 16 þúsund kassar eða tæp 360 tonn komin í frystilestina. 

Jón Kjartansson togar nú og á ekki langt í að fylla sig, blessaður.

En að öðrum fréttum:

Kristján Örn er farinn að æfa sveifluna fyrir inniveruna. Áhugasamir geta fylgst með framförum - eða afturför - á golfvellinum á Eskifirði, utan opnunartíma.

Davíð er að gera alla vitlausa í brúðkaupsæfingum sínum. Hann rífur nú hringa af mannskapnum til þess eins að æfa sig í að setja þá á aftur. Var næstum búinn að sarga puttann af Kastljósskvikindinu með slípirokk til að ná tattúveraða hringnum af honum en með snarræði tókst að afstýra því að Helgi yrði til fingranna eins og pabbi hans.

Halli er ekki á þeim buxunum að fara að skipta um buxur þrátt fyrir gat. Nýjustu fréttir herma að hann hafi ekki þurft að festa kaup á nýjum, eins og ranghermt var í fyrri frétt. Hann fann buxur sem annar fyrrum skipverji, sem líka kláraði matinn sinn sem barn, hafði skilið eftir sig.

Sævar setti hljóðan í morgun, en það stóð ekki lengi.

Sölvi tekur við áskorunum næstu daga vegna mönunar sem hann sætir nú. Hún gengur út á að hann noti Þjóðhátíðarfríið til að láta húðflúra á sig svaðalegasta sjóaratattú sögunnar. Hugmyndin er fenginn frá einum föllnum meistara sem náði ekki að láta verða af því og snýst um að fá sér toghlera á sitthvort herðablaðið; með áföstum bakstroffum sem hlykkjast niður bakið og niður á rasskinnar. Endilega skorið á Sölva í gegnum alla mögulega miðla.

Kastljósskvikindið hefur þegar hafið æfingar til að byrja í aukavinnunni og yfirheyrir nú bátsmanninn reglulega um alla mögulega og ómögulega hluti.

Tommi okkar er fundinn aftur og sömuleiðis nokkrar flöskur af kóki sem hafa verið ófáanlegar um borð síðan í þarþarsíðasta hali.

Ekki hefur enn náðst í skipstjórann eða stýrimanninn. Útgerðarstjórinn var þó helvíti hress þegar náðist í hann, í hálfleik á leik Fjarðabyggðar í gær. Staðan þá var Fjarðabyggð í vil. Ekki hefur náðst í kallinn síðan.

Bátsmannsvaktin kveður og óskar góðrar nætur. Kveðjum með heimspekilegum hugleiðingum frá yngsta skipverjanum:

"Hver ræsir ræsarann?"

Já hver skyldi gera það? Kannski stýrimannsvaktin geti svarað því?

Athugasemdir

[Hlynur Ársælsson (IP-tala skráð) 19.7.2008 kl. 02:39]

Sælir félagar mér finnst eins og bátsmannsvaktinn sé að taka stýrimannsvaktina í rassgatið í fréttaflutningi .Það er gaman að koma hérna og lesa bloggið ykkar þið eruð ansi virkir í því núna Kv úr suðurhöfum Hlynur

[Baldur (IP-tala skráð) 19.7.2008 kl. 14:45]

Sælir, það væri nú gaman að vita hver hefur mögulega getað verið jafn ofvaxinn og hann Halli "litli".  Ég vona að þið getið notað kastljóskvikindið eða Helga Berhenta eins og hann var kallaður í denn.  Flott blogg hjá ykkur og ég vona að þið haldið uppi gríðalega sterkum og áræðalegum fréttaflutningi áfram.

kv. Baldur